Keppnin 2021

Keppnin 2021

Á ári hverju býðst ungu fólki í grunn- og framhaldsskólum að taka þátt í samkeppni á vegum Landverndar. Samkeppnin ber heitið Umhverfisfréttafólk og snýst um að koma umhverfismáli að eigin vali á framfæri við almenning með fjölbreyttum leiðum.

Fjölmörg verkefni bárust í keppnina, voru þau af ólíkum toga og komu frá skólum víðsvegar af landinu.

Framhaldsskólar

Fyrsta sæti

Íris Lilja Jóhannsdóttir, Fjölbrautaskólinn við Ármúla. 

Umsögn dómnefndar

Ein mynd segir oft meira en þúsund orð. Þessi listræna nálgun á hækkandi hitastig jarðar og neysluhyggju okkar grípur strax augað og vekur mann til umhugsunar.

Annað sæti

Vefsíðan – Matarsóun í skólum

Helga Laufey Rúnarsdóttir, Hjörtur Snær Halldórsson, Lingný Lára Lingþórsdóttir, Jóna Kristín Þórhallsdóttir, Sesselja Helgadóttir, Menntaskólinn að Laugarvatni.

Umsögn dómnefndar

Hér tekst að koma réttu magni af upplýsingum á framfæri um mikilvægt málefni á valdeflandi hátt.

Skoða vefinn

Val unga fólksins

Vefsíða – Áhrif snyrtivara á umhverfið

Indíana Ásmundsdóttir, Katrín Ása Wongwan, Priyanka Dana Antao og Tinna Hilmarsdóttir,  Fjölbrautaskólinn við Ármúla.

Umsögn dómnefndar

Vel unnið verkefni sem styðst við áreiðanlegar heimildir. Flott að vekja athygli á þessu vandamáli því það er ekki oft í sviðsljósinu. Mikilvægt er að fræða samfélagið um þær slæmu afleiðingar sem sumar snyrtivörur hafa á umhverfið og vera meðvitaður um þá mengun sem hlýst af framleiðslu þeirra.

Áhrif af snyrtivörum eru beintengd við heimsmarkmið sameinuðu þjóðanna og við erum sammála höfundum verkefnisins – margt smátt gerir eitt stórt!

Skoða vefinn

Grunnskólar

Fyrsta sæti

Instagramsíðan – Umbúðarplast

Berglind Björt Leifsdóttir, Hekla Rán Hilmisdóttir og
Matthías Máni Ingimarson. Garðaskóli.

Umsögn dómnefndar

Síðan fjallar um aðkallandi málefni á aðgengilegan og hnitmiðaðan hátt. Þar að auki er hún vel uppsett sem í þeim hafsjó upplýsinga sem við svömlum í á netinu er gríðar mikilvægt.

Verkefni hlaut einnig verðlaunin Val unga fólksins

Umsögn dómnefndar

Verkefninu tekst vel að miðla upplýsingum um það stóra vandamál sem umbúðaplast er í okkar nútíma samfélagi.

Instagram síðan er vel uppsett, lifandi og aðgengileg fyrir alla til að fræðast eftir góðum heimildum. Gaman að sjá notkun á bæði myndum og sögum á Instagram vegg verkefnisins.

Umbúðaplast er gríðarlega stórt vandamál og virðist oft gleymast á Íslandi, þó svo að flokkunarkerfin séu góð, þá er alltaf hægt að gera betur og vekja fólk til umhugsunar um plast í daglegu lífi.

Fyrsta skrefið í átt að minnka notkun umbúðaplast og auka endurvinnslu þess er einmitt að gera fræðslu aðgengilega og þar eru samfélagsmiðlarnir frábært tól. Gaman væri að sjá verkefnið halda áfram og stækka á miðlinum.

Annað sæti

Hlaðvarp – Áhrif Covid á umhverfið

Hera Björk, Magnús og Margrét Eva
Garðaskóli.

Umsögn dómnefndar

Hlaðvarp er gríðarlega ört vaxandi miðill sem hefur upp á mikið að bjóða, sér í lagi þegar fjallað er um brýn málefni eins og hér. Hér er á ferðinni metnaðarfullt verkefni sem er vel undirbúið, vel framkvæmt og vel frágengið.

Hlusta á hlaðvarpið

Þriðja sæti

Tölvuleikur – Björgum skjaldbökunum

Ragnheiður, Sveinn og Theó. Laugalækjarskóli.

Umsögn dómnefndar

Skemmtilegt og metnaðarfullt verkefni sem sýnir nýstárlega máta til að fræða og hafa jákvæð áhrif á umhverfisvitund og stuðla að umhverfisvernd. Þar að auki er hressandi að fá tölvuleik þar sem skjaldbökum er bjargað, í stað þess að rauðklæddur pípulagningamaður fái stig fyrir að kremja þær.