Hvernig fer Grænfánaúttekt fram?

Eftir að skóli sendir inn umsókn um grænfána fer starfsmaður menntateymis Landverndar yfir umsóknina og finnur tíma fyrir úttekt í kjölfarið.

Í úttektinni gefst skólanum tækifæri til þess að segja frá og sýna það sem unnið var með á liðnu tímabili.  Í úttekt gefst einnig gott tækifæri til að ræða um tækifæri og hindranir verkefnisins í skólanum og geta starfsmenn menntateymisins aðstoðað, frætt og komið með hugmyndir að lausnum.

Fundur með umhverfisnefnd

Rætt er um hvernig til tókst á tímabilinu við fulltrúa frá umhverfisnefnd (mælst er til að hafa nemendur með). Hvernig skrefin sjö voru stigin og hvað var gott og hvað megi betur fara. Horft er til þess hvort þátttaka í verkefninu virðist almenn í skólanum og hvort nemendur séu virkir og sýni áhuga. Einnig hvort markmiðum hafi verið náð að mestu, en mikilvægt er að þau hafi í upphafi verið sett fram á skýran og tiltölulega vel mælanlegan hátt.

Skólinn skoðaður

Skoðað er hvort vinna skólans í sjálfbærni og umhverfismálum sé sýnileg t.d. með markmiðum, umhverfissáttmála og/eða stefnu á áberandi stað ásamt því að fá að sjá verkefni sem unnin hafa verið á tímabilinu.

Spjallað við nemendur

Ef tækifæri gefst þá er spjallað við hóp nemenda um grænfánann og um vinnu þeirra í verkefninu. Litið er inn í bekk/i ef mögulegt er.

Í kjölfar úttektar sendir starfsmaður Skóla á grænni grein skólanum skriflega endurgjöf þar sem farið er yfir hvað hefur gengið vel og hvort það sé eitthvað sem mætti bæta, og þá með tillögum hvernig. Standist skólinn úttekt er afhending grænfána skipulögð.